سبک سارانِ ساحل کیوں ہمیں آواز دیتے ہیں

ہم اپنی کشتیاں رکھتے ہیں طوفانوں سے وابستہ

ظلمتِ غم سے یہ کہہ دو ، کہ نہ الجھے ہم سے

ہم بھی دشمن ہیں اندھیروں کے ، اجالوں کی طرح

خواب شرمندۂ تعبیر ، بھی ہو جاتے ہیں

شکوۂ کاتبِ تقدیر ، بھی ہو جاتے ہیں

اس کی آنکھوں میں نظر آتے ہیں آنسو راشدؔ

لیجئے ٹوٹ گئے آج بھرم پتھر کے

تنہا سفر سے ساتھی بہتر

دوست نہیں تو کوئی دشمن

احباب مجھ سے کس لئے ناراض ہو گئے

میں بات کر رہا تھا اندھیرے کے تیر کی

یہ تو میرا ظرف تھا ، میں ہی مقابل آ گیا

کوئی تو مجروح ہوتا دوستوں کے تیر سے

لگتا ہے کہ صیاد نے ، فطرت ہی بدل دی

ہر پھول مجھے خار کی ، صورت میں ملا ہے

گلوں سے خون ٹپکتا ہے ، خار ہیں شاداب

بنامِ فصلِ بہاراں ، خزاں بہار میں ہے

بھائی! اٹھا لے صحن ، میں دیوار تو مگر

بنیاد میں اخوت و ایثار ڈال دے

تاعمر رفاقت کی قسم کھائی تھی جس نے

بچھڑا ہے تو پھر مجھ کو ، قیامت میں ملا ہے

اس جسارت پر ، گنہ گاروں میں ، شامل کر دیا

میں نے دل کی بات ، کہہ دی تھی ، تری تصویر سے

جل بجھا ، دیکھ کے سورج مری انگنائی میں

آپ کی یاد کے جگنو شبِ تنہائی میں

اس کا ہر عضو بغاوت پہ اتر آتا ہے

کروٹیں لیتی ہیں جب خواہشیں انگڑائی میں

اپنے خوابوں کے تعاقب میں کہاں تک جاؤں

فاصلے پاؤں کی زنجیر بھی ہو جاتے ہیں

آئینہ تو خود ہی گردآلود ہے

آئینہ کے سامنے شرمائیں کیا

غمِ دنیا ، غمِ عقبیٰ ، غمِ جاناں ، غمِ دوراں

یہ زنجیریں بھی اب رہتی ہیں دیوانوں سے وابستہ

اس سے بچھڑ کے جی کا زیاں کم نہیں ہوا

کچھ بڑھ گیا ہے دردِ نہاں کم نہیں ہوا

دو گھڑی بیٹھا تھا راشدؔ تھک کے راہِ شوق میں

انتقاماً اس نے صحرا میں شجر رکھا نہیں

بھول جانے کی اسے میں نے دعا مانگی ہے

دل یہ کہتا ہے خدایا! اسے منفی کر دے

بھول کر بھی نہ کبھی ہم نے اسے یاد کیا

اس طرح بھی دلِ ناشاد ، تجھے شاد کیا

ٹپک رہا ہے مری آنکھ سے لہو بن کر

عجیب کرب میری چشمِ انتظار میں ہے

تمام شہر پہ دشمن کا ہو گیا قبضہ

فقیہِ شہر بشارت کے انتظار میں ہے

حالات تھے جو بھیڑ میں پھرتے رہے لئے

ورنہ ہر ایک آدمی خلوت پسند تھا

دشمن تو کہہ رہا ہے کہ ، ہتھیار ڈال دے

احباب کہہ رہے ہیں کہ ، دستار ڈال دے

کوئی سایہ نہ شجر یاد آیا

تھک گئے پاؤں تو گھر یاد آیا

منزلوں نے جب پکارا ، بےمہابا چل پڑے

ہم نے راہِ شوق میں زادِ سفر رکھا نہیں

اب وہ سودائے جنوں ہے ، نہ تمنا دل میں

ایک عالم ، دلِ برباد نے برباد کیا

میرے بچوں کو بھی احساس ہے غربت کا مری

اب کھلونوں کے لئے کوئی مچلتا بھی نہیں