اشکوں سے سلگتی ہوئی ، امید کو دیکھو

پانی سے اگر گھر کوئی ، جلتے نہیں دیکھا

احبا ب کی یہ ، شانِ شریفانہ سلامت

دشمن کو بھی یوں ، زہر اگلتے نہیں دیکھا

خزاں جو آئی تو ، سمجھا بہار کی آمد

مری نگاہ سے ، پھولوں کی تازگی نہ گئی

وہ حرم میں ہے اور نہ دیر میں ہے

ہم تو دونوں جگہ پکار آئے

بیتابیاں بجا مرے ، ذوقِ سجود کی

لیکن اس آستانہ کے لائق ، یہ سر کہاں

پھر فصلِ بہاراں میں آباد ہوئے گلشن

میرے دلِ ویراں پر حسرت سی برستی ہے

فریادِ غم سے عرشؔ ، سنبھلتا ہے دل مگر

لیتے ہیں اہلِ دل یہ سہارا کبھی کبھی

کیوں لوگ ہوا باندھتے ہیں ، ہمتِ دل کی

ہم نے تو اسے گر کے سنبھلتے نہیں دیکھا

دل ہے لیکن دل میں کوئی غم نہیں

یہ مصیبت بھی تو آخر کم نہیں

وہ دل جو تھا ، امید و تمنا کا سہارا

گرتی ہوئی دیوار ہے ، معلوم نہیں کیوں

تمنا ڈھونڈھتی پھرتی ہے جس کو

مرے پہلو میں اب وہ دل کہاں ہے

میرے دل کی نےرنگی ، پوچھتے ہو کیا مجھ سے

تم نہیں تو ویرانہ ، تم رہو تو بستی ہے

جس تمنا پر شباب ، آیا اسے موت آ گئی

زندگی بھی زندگی کے ، نام سے شرما گئی

مار ڈالا عرشؔ یوں تو ، دوستوں کے قرب نے

یہ غنیمت ہے کہ آخر ، زندگی کام آ گئی