اے آسماں! تیرے خدا کا نہیں ہے خوف

ڈرتے ہیں اے زمین ترے آدمی سے ہم

خدا! پناہ میں رکھے کشاکشِ غم سے

کہ اس سے تارِ نفس جلد ٹوٹ جاتا ہے

موت و ہستی کی کشاکش ، میں کٹی عمر تمام

غم نے جینے نہ دیا ، شوق نے مرنے نہ دیا

محبت کو سمجھنا ہے ، تو ناصح خود محبت کر

کنارہ سے کبھی اندازۂ طوفاں نہیں ہوتا

انہیں اعتبارِ الفت جو نہ ہو سکا ابھی تک

میں سمجھ گیا یقیناً ، ابھی مجھ میں کچھ کمی ہے

رشتۂ الفت کو ظالم ، یوں نہ بے دردی سے توڑ

دل تو پھر جڑ جائے گا ، لیکن گرہ رہ جائے گی

یہ بزمِ مے ہے ، یاں کوتاہ دستی میں ہے محرومی

جو بڑھ کر خود اٹھا لے ہاتھ میں مینا اسی کا ہے

گر کچھ نہ بن پڑی ، تو ڈبو دیں گے سفینہ

ساحل کی قسم ، منتِ طوفاں نہ کریں گے

ساحل کے تماشائی ، ہر ڈوبنے والے پر

افسوس تو کرتے ہیں ، امداد نہیں کرتے

دریا کی زندگی پر ، صدقے ہزار جانیں

مجھ کو نہیں گوارا ، ساحل کی موت مرنا

اس موج کی ٹکر سے ، ساحل بھی لرزتا ہے

کچھ روز جو طوفاں کی ، آغوش میں پل آئے

ساحل کے سکوں سے ، کسے انکار ہے لیکن

طوفان سے لڑنے میں ، مزہ اور ہی کچھ ہے

طوفان کر رہا تھا ، مرے عزم کا طواف

دنیا سمجھ رہی تھی کہ کشتی بھنور میں ہے

فلک کے تاروں سے کیا ، دور ہوگی ظلمتِ شب

جب اپنے گھر کے چراغوں سے ، روشنی نہ ملی

مٹانے سے نہیں مٹتیں ، اگر قسمت کی تحریریں

بشر آمادۂ تدبیر کیوں ہے ، ہم نہیں سمجھے

شک نہ کر میری ، خشک آنکھوں پر

یوں بھی آنسو ، بہائے جاتے ہیں

بہا جاتا ہے تن ، گھل گھل کے ، اشکوں کی روانی میں

گرے کٹ کٹ کے ، دریا کا کنارہ جیسے پانی میں

میرے دامن میں ہیں آنسو ، تیرے آنچل میں بہار

گل بنا سکتی ہے تو ، شبنم بنا سکتا ہوں میں

غم تو ہو حد سے سوا ، اور اشک فشانی نہ ہو

اس سے پوچھو ، جس کا گھر جلتا ہو ، اور پانی نہ ہو

بہتے ہوئے اشکوں پر ، جب غور کیا میں نے

ہر اشک میں ان کی ہی ، تصویر نظر آئی

جن سے دیکھی نہیں جاتی ، مری خستہ حالی

وہی آنسو مری آنکھوں سے ، چھلک جاتے ہیں

روک رکھا ہے بہ مشکل ، جنہیں پلکوں پر ہی

اپنے اشکوں کی وہ سوغات ، کسے پیش کروں

جانے سے ذرا پہلے ، اشکوں کو تو رکنے دو

اتنا تو ٹھہر جاؤ ، طوفاں تو گزر جائے

جب بھی غیروں کی ، عنایت دیکھی

ہم کو اپنوں کے ، ستم یاد آئے

مرے دل پر دوستوں کا ہی نہیں

دشمنوں کا بھی بڑا احسان ہے

غیروں کی دوستی پر ، کیوں اعتبار کیجئے

یہ دشمنی کریں گے ، بیگانہ آدمی ہیں

نہ شکوہ رفیق سے ہے ، نہ شکایت رقیب سے

جو کچھ ہوا ، خدا سے ہوا ، یا نصیب سے

اک سیج کا سنگار ، تو ارتھی پہ اک نثار

دو پھول ایک ساتھ ، کھلے تھے بہار میں

پھولوں کے تو قابل نہیں ، شاید میرا دامن

اے صاحبِ گلشن! اسے کانٹوں سے ہی بھر دے

چھپنا پڑا گلوں کو بھی ، دامانِ خار میں

کچھ ایسے حادثے بھی ، ہوئے ہیں بہار میں

ہنسو کسی پہ تو ، دونوں جہاں سے ڈر کے ہنسو

گلوں کے لب پہ بھی ، دیکھی تھی کل ہنسی میں نے

چل پھر کے تم نے رنگ ، چمن کا بڑھا دیا

غنچوں کو پھول ، پھول کو ، گلشن بنا دیا

خزاں کی رت میں وہ ، کیا مسکرائیں گے یارو

جو غنچے موسمِ گل میں بھی ، مسکرا نہ سکے

پھولوں کے ساتھ ساتھ ہیں ، حقدار خار بھی

تنہا گلوں کا ہی نہیں ، موسم بہار کا

رفیقوں سے رقیب اچھے ، جو جل کر نام لیتے ہیں

گلوں سے خار بہتر ہیں ، جو دامن تھام لیتے ہیں

چمن کا حسن سمجھ کر ، سمیٹ لائے تھے

کسے خبر تھی کہ ہر پھول ، خار نکلے گا

جب پڑا وقت چمن پہ ، تو لہو ہم نے دیا

اب بہار آئی تو کہتے ہیں ، ترا کام نہیں

پھولوں کے ساتھ ساتھ ہیں ، حقدار خار بھی

تنہا گلوں کا ہی نہیں موسم بہار کا

بھلا کیوں نہ کانٹوں کو ، دل سے لگائے

وہ جس نے گلوں سے بھی ، ہوں زخم کھائے

ان آبلوں سے پاؤں کے ، گھبرا گیا تھا میں

دل خوش ہوا ہے راہ کو ، پرخار دیکھ کر

گل ہائے زندگی تو کھلے ، اور بکھر گئے

کانٹے جو زیرِ سایۂ گل تھے ، ابھر گئے

کیسے مسجد میں ، پیوں میں زاہد

ایک بوتل ہے ، خدا مانگ نہ لے

جس میں لاکھوں برس کی حوریں ہوں

ایسی جنت کا ، کیا کرے کوئی

گناہ گاروں کے دل سے ، نہ بچ کے چل زاہد

یہیں کہیں تری جنت بھی ، پائی جاتی ہے

کسی دیوار نے سیلِ جنوں ، روکا نہیں اب تک

یہ مصرع کوئی مجنوں ، لکھ گیا دیوارِ زنداں پر

سجدہ ہو بےخلوص ، تو سجدہ بھی ہے گناہ

لغزش میں ہو خلوص تو ،لغزش نماز ہے

دنیا میں وہی شخص ہے تعظیم کے قابل

جس شخص نے حالات کا رخ موڑ دیا ہے

خدا جانے یہ دنیا ، جلوہ گاہِ ناز ہے کس کی

ہزاروں اٹھ گئے لیکن ، وہی رونق ہے مجلس کی

میری آنکھیں اور ، دیدار آپ کا

یا قیامت آ گئی ، یا خواب ہے

خود منانے جنہیں ، رحمتِ حق آئی ہے

اونچے درجہ کے گنہ گار نظر آتے ہیں

اے رحمتِ تمام کرم جب ہیں بےشمار

ناحق مرے گناہ کا ، پھر کیوں کر حساب ہو

مرے گناہ بڑے ہیں ، کہ تری رحمت ہے

مرے کریم بتا دے ، حساب کرکے مجھے

اس بھروسہ پہ کر رہا ہوں گناہ

بخش دینا تو تیری فطرت ہے

جب بہاروں نے نہ پایا ، کوئی بھی اپنا مقام

تیرے ہونٹوں کے تبسم سے لپٹ کر سو گئی

کیا نزاکت ہے کہ عارض ان کے نیلے پڑ گئے

ہم نے بوسے لیا تھا خواب میں تصویر کا

مجھ کو یہ آرزو ، وہ اٹھائیں نقاب خود

ان کو یہ انتظار ، تقاضا کرے کوئی

مسکرا کر اک نگاہِ مست ، سب پر ڈال دو

ہم بھی دیکھیں انجمن میں کتنے اہلِ ہوش ہیں

تو اور چشمِ لطف نئی ، واردات ہے

میری نگاہ نے مجھے دھوکا دیا نہ ہو

تم نے سورج کبھی پچھم سے نکلتے دیکھا

اس کو وعدہ نہیں کہتے ، جو وفا ہو جائے

وہ بزم دیکھی ہے میری نگاہ نے کہ جہاں

بغیر شمع بھی جلتے رہے ہیں پروانے

اے شمع! تیری عمرِ طبیعی ، ہے اک رات

ہنس کر گزار یا اسے ، رو کر گزار دے

نشیمن میں ہی کون سے سکھ ملے ہیں

جو روؤں نشیمن کو رہ کر قفس میں

ملے گی کوئی مسرت تو جی نہ پائیں گے

کٹی ہے عمر غموں سے نباہ کرتے ہوئے

حادثوں سے جذبۂ تعمیر رکتا ہے کہیں

بجلیاں گرتی رہیں اور آشیاں بنتا رہا

یہ کس نے شاخِ گل لا کر قریبِ آشیاں رکھ دی

کہ میں نے شوقِ گل بوسی میں کانٹوں پر ، زباں رکھ دی

دل کے آئینہ میں ہے تصویرِ یار

اک جب ذرا گردن جھکائی ، دیکھ لی

ان آئینوں کو اٹھا کر کمروں سے باہر پھینک دو

بےادب یہ کہہ رہے ہیں ہم پرانے ہو گئے

ہم نہ کہتے تھے کہ ، دیکھو نہ تم آئینہ

آئینہ بنے بیٹھے ہو ، آئی نہ وہی بات

یوں تو آئینہ میں کوئی عیب نہیں

صاف دل ہے بس یہی اک برائی ہے

رک گئیں گردشیں زمانے کی

ان کے ماتھے پہ جب شکن آئی

زمانہ بڑے شوق سے سن رہا تھا

ہمیں سو گئے داستاں کہتے کہتے

یہ ہوش و خرد والے آپس میں لڑیں لیکن

دیوانے سے دیوانہ شاید ہی لڑا ہوگا

یہ کہہ کر دیا اس نے دردِ محبت

جہاں ہم رہیں گے یہ ساماں رہے گا

اک دل کا درد تھا کہ رہا زندگی کے ساتھ

اک دل کا چین تھا کہ سدا ڈھونڈھتے رہے

دردِ دل کے واسطے پیدا کیا انسان کو

ورنہ طاعت کے لئے کچھ کم نہ تھے کروبیاں

جس جگہ دیکھو اس جگہ موجود

درد ، اللہ سا لگے ہے مجھے

زندگی کیا ہے دم بہ دم چلنا

موت کیا ہے تھکن خیالوں کی

تم گل سے گال قبر پہ رکھتے تو بات تھی

کیا فائدہ جو پھولوں کا انبار کر دیا

آئے وہ میری قبر پر لیکن عدو کے ساتھ

مر کر بھی میں نے چین ، نہ پایا مزار میں

زمین قبر کی ، ہم نے خرید رکھی ہے

خدا کا شکر ہے ہم بھی مکان والے ہیں

گل سے بھی نازک بدن ہے ، اس کا لیکن دوستو

یہ غضب کیا ہے کہ دل ، پہلو میں پتھر کا بنا

دل کی مفارقت کو ، کہاں تک نہ روئیے

اللہ ایک عمر کا ، ساتھی بچھڑ گیا

دل ٹوٹنے سے تھوڑی سی تکلیف تو ہوئی

لیکن تمام عمر کا آرام ہو گیا

دل کے آئینہ میں ہے تصویرِ یار

اک ذرا گردن جھکائی ، دیکھ لی

رہو دل میں ورنہ یہ عالم کہے گا

کہ یہ اپنے گھر سے نکالے ہوئے ہیں

کاش لے آتے زباں تک ، دل کو ہم

بےزباں ہو کر بھی رسوا ہو گئے

محبت کے لئے دل ڈھونڈھ کوئی ٹوٹنے والا

یہ وہ مے ہے جسے رکھتے ہیں نازک آبگینوں میں

وحشتیں کچھ اس قدر ، اپنا مقدر بن گئیں

ہم جہاں پر بھی گئے ہیں ، ساتھ ویرانے گئے

سب کچھ خدا سے مانگ لیا ، تجھ کو مانگ کر

اٹھتے نہیں ہیں ہاتھ مرے ، اس دعا کے بعد

خزاں کی رات تڑپ کے کاٹنے والے

تجھے بہار میں نیند آ گئی تو کیا ہوگا

ہم چمن میں گئے بارہا لیکن

کبھی بہار سے پہلے کبھی بہار کے بعد

مغرور نہ ہو فصلِ خزاں ، آ کے چمن میں

ایسے بھی ہیں کچھ پھول ، جو مرجھا نہیں سکتے

مل ہی جائے گی کہیں ، ڈھونڈھنے والوں کو مگر

ہر گلستاں میں خزاں ہو ، یہ ضروری تو نہیں

نہ خزاں میں ہے کوئی تیرگی ، نہ بہار میں کوئی روشنی

یہ نظرنظر کے چراغ ہیں ، کہیں جل گئے کہیں بجھ گئے

وہ اگر مجھ کو نہ بھولیں ، تو بھلائیں کس کو

ہم اگر ان کو بھلا دیں تو کسے یاد کریں

چلو اچھا ہوا محرومیوں میں کٹ گئی اپنی

کسی کو یاد کیا کرتے ، کسی کو یاد کیا آتے

یوں تو رہتی ہے تصور میں تمہاری صورت

پھر بھی مل جاؤ تو تسکین سی ہو جاتی ہے

تصور میں ہی آ جاتے تمہارا کیا بگڑ جاتا

تمہارا پاس رہ جاتا ، ہمیں دیدار ہو جاتا

وصل میں خالی ہوئی غیر سے محفل تو کیا

شرم بھی جائے تو میں جانوں کہ تنہائی ہوئی

ہم باوفا تھے اس لئے نظروں سے گر گئے

شاید انہیں تلاش کسی بےوفا کی تھی

ضبط کر اے دل ، وہ آنسو جو کہ چشمِ تر میں ہے

کچھ نہیں بگڑا ابھی کہ گھر کی دولت گھر میں ہے

پلکوں کی حد کو توڑ کے دامن میں آ گرا

اک اشک صبر کی توہین کر گیا

بند تھی آنکھیں کسی کی یاد میں

موت آئی اور دھوکا کھا گئی

نازکی ختم ہے ان پر جو یہ فرماتے ہیں

فرشِ مخمل پہ مرے پاؤں چھلے جاتے ہیں

کیا نزاکت ہے کہ ، عارض ، ان کے نیلے پڑ گئے

ہم نے تو بوسہ لیا تھا ، خواب میں ، تصویر کا

شانہ پہ زلف ، زلف میں دل ، دل میں حسرتیں

اتنا ہے بوجھ سر پہ ، نزاکت کہاں رہی

ہم ایسے ناتواں ، وہ ایسے نازک

اٹھائے کون پردہ درمیاں سے

ذرا سی بات میں قصہ تمام ہوتا ہے

ادا سے دیکھ لو اک بار نیم جاں کی طرف

سخت نازک مزاج ، دلبر تھا

خیر گزری کہ دل بھی ، پتھر تھا

دنیا بھلا چکی ، ہے مجھے یہ درست ہے

یہ تو نہیں ہے کہ ، بھول گیا ہے خدا مجھے

کہاں جائے اٹھ کر بتوں کی گلی سے

یہیں سے ہے کعبہ کو ، سجدہ ہمارا

مٹایا ہے ہمیں نے اس کو ورنہ کیا سے کیا ہوتی

ہماری داستاں جتنا گلہ ہم سے کرے کم ہے

جنہیں زمین پہ رہنے کا بھی شعور نہیں

انہیں کا ہے یہ تقاضا کہ آسماں لے لو

آہ جاتی ہے فلک پر رحم لانے کے لئے

بادلو ہٹ جاؤ دے دو راہ ، جانے کے لئے

جہاں میں جن کی امیدوں کے بیڑے پار ہوتے ہیں

جہاں میں ایسے انساں تو فقط دو چار ہوتے ہیں

آہٹ پہ کان ، در پہ نظر ، دل میں اشتیاق

کچھ ایسی بےخودی ہے ترے انتظار میں

ہزار شکر کہ مایوس کر دیا تو نے

یہ اور بات کہ تجھ سے بہت امیدیں تھیں

کرم کی توقع تو کیا تم سے ہوگی

ستم بھی کرو گے تو احسان ہوگا

جو ستم غیر کے قابل تھا ، وہ مجھ پر ہوتا

کاش تو میرے اکیلے کا ستم گر ہوتا

تیرا کرم تو عام ہے دنیا کے واسطے

ہم کتنا لے سکے یہ مقدر کی بات ہے

تقدیر کے قدموں میں سر رکھ کے پڑے رہنا

تائیدِ ستم گر ہے چپ رہ کے ستم سہنا

میں تری یاد میں ہوں اے کافر!

مسجدوں میں نماز ہوتی ہے

یہ بزمِ مے ہے یاں ، کوتاہ دستی میں ہے محرومی

جو بڑھ کر خود اٹھا لے ہاتھ میں ، مینا اسی کا ہے

محتسب نہ پھینک ارے محتسب نہ پھینک

ظالم! شراب ہے ارے ظالم! ، شراب

جام ساقی نے جو بے رخی سے دیا

مے کدے سے چلے آئے ہم بے پئے

خطا میری نہ تھی زاہد! غلط فہمی تھی ساقی کی

وہ بھر کر جام لے آیا ، میں کہتا رہ گیا ، "لا،لا"

اس طرف رخ تری رحمت کا جو دیکھا دمِ حشر

مل گئے دوڑ کے زاہد بھی گنہ گاروں میں

احساس مر نہ جائے تو انسان کے لئے

کافی ہے ایک بار کی ٹھوکر لگی ہوئی

احساس سے انداز بدل جاتے ہیں ورنہ

دامن بھی ، اسی تار سے ، بنتا ہے کفن بھی

فطرت کبھی نہ لالہ و گل کی بدل سکی

آ آ کے انقلاب گلستاں میں رہ گئے

اک تنکے نے کسی طوفان کے

ساتھ اڑکر جا لیا آکاش چھو

یہ عشق نہیں آساں ہم نے تو یہ جانا ہے

کاجل کی لکیروں کو آنکھوں سے چرانا ہے

جان لینی تھی لے لئے ہوتے

مسکرانے کی کیا ضرورت تھی

سیتا کی آبرو کا ہے تجھ کو اگر خیال

راموں کے بھیس میں چھپے راون تلاش کر

سوچتا ہوں سیکھ لوں مکاریاں

بیٹھنا ہے آج کچھ یاروں کے بیچ

ہم آہ بھی کرتے ہیں تو ہو جاتے ہیں بدنام

وہ قتل بھی کرتے ہیں تو چرچہ نہیں ہوتا

مدعی لاکھ برا چاہے تو کیا ہوتا ہے

وہی ہوتا ہے جو منظورِ خدا ہوتا ہے

کل جو اٹھتے تھے بٹھانے کے لئے

آج بیٹھے ہیں اٹھانے کے لئے

جو پڑی دل پہ سہہ گئے لیکن

ایک نازک سی بات نے مار ڈالا

غم کا طوفاں بھی گزر ہی جائے گا

مسکرا دینے کی عادت چاہئے

مجھے شرع سے کوئی چڑھ نہیں ، پر اس اتفاق کا کیا کروں

کہ جو وقت بادہ کشی کا ہے وہی وقت بھی ہے نماز کا

آدم کو مت خدا کہو ، آدم خدا نہیں

لیکن خدا کے نور سے آدم جدا نہیں

دیر کعبہ سے جدا ، کعبہ کلیسا سے جدا

ان کو میخانہ کے سنگم پہ ملا دے ساقیا

جب جب مسجد جانا پڑا ہے

راہ میں اک میخانہ پڑا ہے

بلبل کو پیار باغ سے ، کوئل کو بن سے پیار

کیوں کر نہ آدمی کو ہو اپنے وطن سے پیار

دیر ہوئی آنے میں تم کو ، شکر ہے پھر بھی آئے تو

آس نے دل کا ساتھ نہ چھوڑا ، ویسے ہم گھبرائے تو

مجھے اٹھانے کو آیا ہے واعظِ ناداں

جو ہو سکے تو مرا ساغرِ شراب اٹھا

مے کدہ میں کبھی تو آ واعظ

ایک دنیا یہاں بھی بستی ہے

کل رات میکدہ میں عجب حادثہ ہوا

واعظ مرے حساب میں پی کر چلا گیا

کوئی ان پھولوں کی قسمت دیکھنا

زندگی کانٹوں میں پل کر رہ گئی

ہوتا نہیں ہے کوئی برے وقت میں شریک

پتے بھی بھاگتے ہیں خزاں میں شجر سے دور

کانٹوں نے مبارک کام کیا

پھولوں کی حفاظت کر بیٹھے

اے مرے ہم نشیں چل کہیں اور چل

اس چمن میں اب اپنا گزارا نہیں

بات ہوتی گلوں کی تو سہہ لیتے

اب تو کانٹوں پہ بھی حق ہمارا نہیں

ہم نے اپنے آشیانہ کے لئے

جو چبھیں دل میں وہی تنکے لئے

عشق جب تک نہ کر چکے رسوا

آدمی کام کا نہیں ہوتا

عشق میں خواب کا خیال کسے

نہ لگی آنکھ جب سے آنکھ لگی

پیدا ہوئے تو ہاتھ جگر پر دھرے ہوئے

کیا جانے ہم ہیں کب سے کسی پر مرے ہوئے

دل ٹوٹنے سے تھوڑی سی تکلیف تو ہوئی

لیکن تمام عمر کا آرام ہو گیا

ابھی کمسن ہو ، رہنے دو ، کہیں کھو دو گے دل میرا

تمہارے ہی لئے رکھا ہے ، لے لینا جوان ہو کر

جھکتی ہے نگاہ اس کی مجھ سے مل کر

دیوار سے دھوپ اتر رہی ہو گویا

ان کو آتا ہے پیار پر غصہ

ہم کو غصہ پہ پیار آتا ہے

رفیقوں سے رقیب اچھے جو جل کر نام لیتے ہیں

گلوں سے خار بہتر ہیں جو دامن تھام لیتے ہیں

غیر کو آنے نہ دوں ، تم کو کہیں جانے نہ دوں

کاش مل جائے تمہارے در کی دربانی مجھے

گھروں پہ نام تھے ناموں کے ساتھ کے عہدے تھے

بہت تلاش کیا کوئی آدمی نہ ملا

ہم وپ دریا ہیں جسے اپنا ہنر معلوم ہے

جس طرف بھی چل پڑیں گے راستے بن جائیں گے

آج اپنی فالتو چیزیں جدا کرتا ہوں میں

ہے کوئی جس کو شرافت چاہئے

مسجد خدا کا گھر ہے یہ پینے کی جا نہیں

کافر کے دل میں جا کہ وہاں پر خدا نہیں

جن کے آنگن میں دولت کے شجر اگتے ہیں

ان کے ہر عیب دنیا کو ہنر لگتے ہیں

اب ساتھ چھوڑ دے تو خطا زندگی کی کیا

ہم خود ہی اتنا تیز چلے تھے کہ تھک گئے

چلا جاتا ہوں ہنستا کھیلتا موجِ حوادث سے

اگر آسانیاں ہوں زندگی دشوار ہو جائے

زندگی ، زندہ دلی کا نام ہے

مردہ دل ، کیا خاک جیا کرتے ہیں

کون سا جھونکا ، بجھا دے گا ، کسے معلوم ہے

زندگی کی شمع ، روشن ہے ، ہوا کے سامنے

آپ مجھ کو ، اگر اجازت دیں

آپ کو ، اپنی زندگی کہہ دوں

ڈبو کے سارے سفینے ، قریب ساحل کے

ہے ان کو پھر بھی یہ دعویٰ ، کہ ناخدا ہم ہیں

خدا کے ڈر سے ہم تم کو ، خدا تو کہہ نہیں سکتے

مگر لطفِ خدا ، قہرِ خدا ، شانِ خدا ، تم ہو

فانوس بن کے جس کی حفاظت خدا کرے

وہ شمع کیا بجھے جسے روشن خدا کرے

خدا اور ناخدا مل کر ڈبو دیں ، یہ تو ممکن ہے

فقط طوفاں تباہی کا تو ، باعث ہو نہیں سکتا

جو جان ہے موسم کی اب جانے کہاں ہے وہ

پانی تو برستا ہے برسات نہیں ہوتی

ستم کو وہ کرم ثابت کریں گے

ذہانت ان کو بخشی ہے خدا نے

ترے کرم کے بھروسہ پہ ، حشر میں یا رب

گناہ لایا ہوں ، اور بےحساب لایا ہوں

جب سفر بےسمت ہو جائے ، تو پھر ،منزل کہاں

کھونے والے نے کبھی ، اس راز کو پایا نہیں

خیر گزری کہ نہ پہنچی ترے در تک ورنہ

آہ نے آگ لگا دی ہے جہاں ٹھہری ہے

مرنے کی آرزو مجھے مدت سے تھی مگر

لیکن یہ کام ہو نہیں سکتا جئے بغیر

وہ جام ہوں جو خونِ تمنا سے بھر گیا

یہ میرا ظرف ہے کہ چھلکتا نہیں ہوں میں

آرزو وصل کی رکھتی ہے پریشاں کیا کیا

کیا بتاؤں کہ مرے دل میں ، ہیں ارماں کیا کیا

جب تک ملے نہ تھے ، تو جدائی کا تھا ملال

اب یہ ملال ہے ، کہ تمنا نکل گئی

کہہ رہا ہے موجِ دریا سے سمندر کا سکوت

جس میں جتنا ظرف ہے اتنا ہی وہ خاموش ہے

کسی اک آدھ مےکش سے خطا کچھ ہو گئی ہوگی

مگر کیوں مےکدے کا مےکدہ بدنام ہے ساقی

اتنا کہاں تھا ہوش کہ مسجد سدھارتے

واعظ نے مےکدہ میں مصلّیٰ بچھا لیا

موسمِ گل میں عجب رنگ ہے مےخانے کا

شیشہ جھکتا ہے کہ منہ چوم لے پیمانے کا

ترکِ مے کی ضد نے آخر طول کھینچا اس قدر

شیخ میرے ساتھ میخانے میں داخل ہو گئے

بہار آئی ہے بھر دے ، وعدۂ گلگوں سے پیمانہ

رہے لاکھوں برس ساقی ، ترا آباد میخانہ

پوچھو کسی غریب کے اجڑے دیار سے

بیٹھا ہے کیوں خموش در و بام کی طرح

ہو برا انسان کے افلاس کا

چھین لیتا ہے سبھی اچھائیاں

مجھ کو شکوہ ہے اپنی آنکھوں سے

تم نہ آئے تو نیند کیوں آئی

دل تو شوقِ دید میں تڑپا کیا

آنکھ ہی کم بخت شرماتی رہی

فریاد کر رہی ہے وہ ترسی ہوئی نگاہ

دیکھے ہوئے کسی کو زمانہ گزر گیا

اٹھ رہی ہے وہ آنکھ رک رک کر

قتل میں ہو رہا ہوں قسطوں میں

رہ گئے لاکھوں کلیجہ تھام کر

آنکھ جس جانب تمہاری اٹھ گئی

کچھ روز یہ بھی رنگ رہا انتظار کا

آنکھ اٹھ گئی جدھر ، بس ادھر دیکھتے رہے

مزہ برسات کا چاہو تو ان آنکھوں میں آ بیٹھو

سیاہی ہے ، سفیدی ہے ، شفق ہے ، ابرِ باراں ہے

ایک بندہ بھی نہیں ، ہو جس کا مذہب بندگی

کوئی کافر ہو گیا ، کوئی مسلماں ہو گیا

تری یاد ہے مری بندگی ، تری داد میری نماز ہے

مری بندگی تو ہے مختصر ، ترے غم کی عمر دراز ہے