غزل

پتھر ہی رہنے دیجئے شیشہ نہ کیجئے

احباب سے وفا کا تقاضا نہ کیجئے

جس سے ہمارے دیش کی قدریں ہوں پائمال

ایسی کسی بھی شئے کی تمنا نہ کیجئے

دامن میں کوئی ساری خدائی بھی ڈال دے

لیکن کبھی اصول کا سودا نہ کیجئے

عزت کی موت کو بھی لگا لیجئے گلے

ذلت کی زندگی بھی گوارا نہ کیجئے

دکھ جائے دل کسی کا رویہ سے آپ کے

ایسا نہ کیجئے کبھی ایسا نہ کیجئے

کچھ شمعیں رہگزر میں بھی رکھئے تو بات ہے

اپنے ہی گھر میں صرف اجالا نہ کیجئے

حالات کہہ رہے ہیں زمانہ کے ساتھ چل

لیکن اشوکؔ آپ تو ایسا نہ کیجئے