کہہ رہا ہے موجِ دریا سے سمندر کا سکوت

جس میں جتنا ظرف ہے اتنا ہی وہ خاموش ہے

وقت تو دو ہی کٹھن گزرے ہیں میری عمر میں

اک ترے آنے سے پہلے اک ترے جانے کے بعد

ہنسی آئی تو ہے بےکیف سی لیکن خدا جانے

مجھے مسرور پاکر میرے غمخواروں پہ کیا گزری

جی کانپتا ہے خلد میں رکھتے ہوئے قدم

ڈر ہے کہ اس زمیں پہ بھی آسماں نہ ہو

جو ستم غیر کے قابل تھا ، وہ مجھ پر ہوتا

کاش تو میرے اکیلے کا ستم گر ہوتا

ذکر اس پری وش کا ، اور پھر بیاں اپنا

بن گیا رقیب آخر ، تھا جو رازداں اپنا

یہ بزمِ مے ہے یاں ، کوتاہ دستی میں ہے محرومی

جو بڑھ کر خود اٹھا لے ہاتھ میں ، مینا اسی کا ہے

اب غرق ہوں میں آٹھ پہر ، مے کی یاد میں

توبہ نے مجھ کو اور گنہ گار کر دیا

وہ انسانی مسائل ، جو ابھی ناقابلِ حل ہیں

اگر رندوں کو فرصت ہو تو مےخانہ میں رکھ دینا

کون فطرت کے تقاضوں کو بدل سکتا ہے

شمع ہر حال میں چاہے گی فروزاں ہونا

کہنے کو بھائی بھائی ہیں اہلِ وطن تمام

پھرتے ہیں آستینوں میں خنجر لئے ہوئے

پتہ یوں تو بتاتے ہیں وہ سب کو لامکاں اپنا

مگر معلوم ہے رہتے ہیں وہ ٹوٹے ہوئے دل میں