شیخ و برہمن

شیخ صاحب! مقابلہ کیسا آپ کا ، ہم شراب نوشوں سے

ایک عصمت فروش بہتر ہے ، آپ جیسے خدا فروشوں سے

یقیں تھا شیخ کو جنت میں جام کھنکیں گے

اسی خوشی میں وہ پیاسا ہی مر گیا ہوگا

باقی ہے شیخ کو ابھی حسرت گناہ کی

کالا کرے گا منہ بھی جو داڑھی سیاہ کی

شیخ قاتل کو مسیحا کہہ گئے

محترم کی بات کو جھٹلائیں کیا

یہ مسجد ہے یا مےخانہ ، تعجب اس پہ آتا ہے

جنابِ شیخ کا نقشِ قدم ، یوں بھی ہے اور یوں بھی

واعظ جی کو شب کیا سوجھی رندوں کو سمجھانے آئے

صبح کو سارے میکش ان کو مسجد تک پہنچانے آئے

قرض لایا ہے کوئی بھیس بدل کر شاید

مے فروشوں کا ہے واعظ سے تقاضا کیسا

تر بہ تر ہے شیخ کا دامن ، لبالب ہے برہمن کا کمنڈل بھی

اس پہ بھی کرتے ہیں رندوں سے ، وہ دعویٰ پارسائی کا