آسرا-سہارا

ابھی زندہ ہوں لیکن سوچتا رہتا ہوں خلوت میں

کہ اب تک کس تمنا کے سہارے جی لیا

کچھ اعتبارِ وعدۂ فردا نہیں رہا

اب یہ بھی زندگی کا سہارا نہیں رہا

محبت میں سکوں محرومیوں کے بعد آتا ہے

کہ جب ہر آسرا مٹ جائے تب دل چین پاتا ہے

چند تنکوں کے سہارے کب تلک رہ پاؤگے

آؤ کشتی بھی ہے میرے پاس ، پتواریں بھی ہیں

فطرت کی مشیت بھی بڑی چیز ہے لیکن

فطرت کبھی بےبس کا سہارا نہیں ہوتی

تکوگے راہ سہاروں کی ، تم میاں کب تک

قدم اٹھاؤ کہ، تقدیر انتظار میں ہے

میں تو برباد ہو گیا ہوں مگر

اب کسی کو نہ آسرا دینا

دریائے محبت میں اک ڈوبنے والے کو

ہوتا ہے بہت یارو ، تنکے کا سہارا بھی