برق و نشیمن

اب بجلیوں کا خوف بھی دل سے نکل گیا

خود میرا آشیاں میری آہوں سے جل گیا

دیکھ کر برق کی پریشانی

آشیاں خود ہی پھونک ڈالا ہے

تڑپ رہی ہے جو ابرِ سیاہ میں بجلی

فراق میں یہی نقشہ تھا ہوبہو میرا

کیا مزہ دیتی ہے بجلی کی چمک مجھ کو ریاضؔ

مجھ سے لپٹے ہیں مرے نام سے ڈرنے والے

ثبوت برق کی غارتگری کا کس سے ملے

کہ آشیاں تھا جہاں ، اب وہاں دھؤاں بھی نہیں

لپٹ جاتے ہیں وہ بجلی کے ڈر سے

الٰہی! یہ گھٹا دو دن تو برسے

بجلی کی تانک جھانک سے تنگ آ گئی ہے جاں

ایسا نہ ہو کہ پھونک دوں خود آشیاں کو میں

بجلیاں کوند رہی ہیں کہ تکلم تیرا

برق نے قید میں رکھا ہے تبسم تیرا